Schuel isch cool!

Text/Musik: Matthias Frei

I gieng jo gärn id Schuel, aber eifach isch es nid,
es git so vil z tue und mängisch tschegg is eifach nid.
I bi z beduure – i muess id Schuel.
Doch immer chlööne cha jo niemer,
darum dänk i mängisch lieber:
Schuel isch cool!

Chorus:
Schuel isch cool!
Das sägi immer, wenn s mir nid so guet goht.
Schuel isch cool!
Mi letschti Spruch bevor s mir d Sproch verschloht.
Schuel isch cool!
I hoffe, dass mir das au einisch ufgoht.
Schuel isch cool!
Zletscht glaub i s sälber, wenn s no lang so witergoht.
Schuel isch cool!

Mer sett ke Lehrer ha, keini Probe und Tescht,
nur wer wett, müessti goh – i säg der: D Schuel wär es Fescht!
Doch leider : Nä-ä! (Kopf schütteln) – Schuel isch Schuel.
Doch euse Lehrer säit: «Mach s Beschte usem Schlächte!» (Lehrer)
Das heisst für eus:
Schuel isch cool!

Chorus

Es isch nid immer so, mängisch gfallts mer au guet,
aber do derzue stoh, das brucht de scho chli Muet.
Hüt chasch nümm säge: I wott id Schuel!
Jo, hüt luegt doch jede komisch,
wenn du säisch – und debi froh bisch:
Schuel isch cool!

Schuel isch cool!
Das sägi immer, wenn s mir bsunders guet goht.
Schuel isch cool!
Mi cooli Spruch, wo jedem d Sproch verschloht.
Schuel isch cool!
I weiss, es isch eso, s isch noni z spoht.
Schuel isch cool!
I hoffe, dass es au no lang so witergoht.     (wiederholen)

Schuel isch cool!

Oh yeah!!